Root 3

root kee shaadee kee koshishen

¹ek din naomee root say mukhaatib huee, “betee, main aap kay liyay ghar ka band-o-bast karna chaahatee hoon, aisee jagah jahaan aap kee zarooriyaat aainda bhee pooree hotee rahengee. ²ab dekhen, jis aadmee kee naukraaniyon kay saath aap nay baalen chunee hain vah hamaara qareebee rishtedaar hai. aaj shaam ko boaz gaahanay kee jagah par jau phatkega. ³to sun len, achchhee tarah naha kar khushboodaar tel laga len aur apna sab say khoobsoorat libaas pahen len. phir gaahanay kee jagah jaaen. lekin usay pata na chalay ki aap aaee hain. jab vah khaanay-peenay say faarigh ho jaaen ⁴to dekh len ki boaz sonay kay liyay kahaan let jaata hai. phir jab vah so jaaega to vahaan jaaen aur kambal ko us kay pairon say utaar kar un kay paas let jaaen. baaqee jo kuchh karna hai vah aap ko usee vaqt bataaega.”

⁵root nay javaab diya, “theek hai. jo kuchh bhee aap nay kaha hai main karoongee.” ⁶vah apnee saas kee hidaayat kay mutaabiq tayyaar huee aur shaam kay vaqt gaahanay kee jagah par pahunchee. ⁷vahaan boaz khaanay-peenay aur khushee manaanay kay baad jau kay dher kay paas let kar so gaya. phir root chupkay say us kay paas aaee. us kay pairon say kambal hata kar vah un kay paas let gaee.

⁸aadhee raat ko boaz ghabra gaya. tatol tatol kar usay pata chala ki pairon kay paas aurat padee hai. ⁹us nay poochha, “kaun hai?” root nay javaab diya, “aap kee khaadima root. meree ek guzaarish hai. choonki aap meray qareebee rishtedaar hain is liyay aap ka haq hai ki meree zarooriyaat pooree karen. meharbaanee karkay apnay libaas ka daaman mujh par bichha kar zaahir karen ki meray saath shaadee karengay.”

¹⁰boaz bola, “betee, rabb aap ko barkat day! ab aap nay apnay susraal say vafaadaaree ka pahelay kee nisbat ziyaada izhaar kiya hai, kyoonki aap javaan aadmiyon kay peechhay na lageen, khwaah ghareeb hon ya ameer. ¹¹betee, ab fikr na karen. main zaroor aap kee yah guzaarish pooree karoonga. aakhir tamaam maqaamee log jaan gaay hain ki aap shareef aurat hain. ¹²aap kee baat sachch hai ki main aap ka qareebee rishtedaar hoon aur yah mera haq hai ki aap kee zarooriyaat pooree karoon. lekin ek aur aadmee hai jis ka aap say ziyaada qareebee rishta hai. ¹³raat kay liyay yahaan thaheren! kal main us aadmee say baat karoonga. agar vah aap say shaadee karkay rishtedaaree ka haq ada karna chaahay to theek hai. agar naheen to rabb kee qasam, main yah zaroor karoonga. aap subah kay vaqt tak yaheen letee rahen.”

¹⁴chunaanchay root boaz kay pairon kay paas letee rahee. lekin vah subah munh andheray uth kar chalee gaee taaki koee usay pahechaan na sakay, kyoonki boaz nay kaha tha, “kisee ko pata na chalay ki koee aurat yahaan gaahanay kee jagah par meray paas aaee hai.” ¹⁵root kay jaanay say pahelay boaz bola, “apnee chaadar bichha den!” phir us nay koee bartan chhah dafa jau kay daanon say bhar kar chaadar men daal diya aur usay root kay sar par rakh diya. phir vah shaher men vaapas chala gaya.

¹⁶jab root ghar pahunchee to saas nay poochha, “betee, vaqt kaisa raha?” root nay usay sab kuchh sunaaya jo boaz nay javaab men kiya tha. ¹⁷root bolee, “jau kay yah daanay bhee us kee taraf say hain. vah naheen chaahata tha ki main khaalee haath aap kay paas vaapas aaoon.” ¹⁸yah sun kar naomee nay root ko tasallee dee, “betee, jab tak koee nateeja na niklay yahaan thaher jaaen. ab yah aadmee aaraam naheen karega balki aaj hee muaamalay ka hal nikaalega.”