Root 4
1boaz shaher kay darvaazay kay paas ja kar baith gaya jahaan buzurg faislay kiya kartay thay. kuchh der kay baad vah rishtedaar vahaan say guzra jis ka zikr boaz nay root say kiya tha. boaz us say mukhaatib hua, “dost, idhar aaen. meray paas baith jaaen.”
rishtedaar us kay paas baith gayaa 2to boaz nay shaher kay das buzurgon ko bhee saath bithaaya. 3phir us nay rishtedaar say baat kee, “naomee mulk-ay-moaab say vaapas a kar apnay shauhar ileemlik kee zameen farokht karna chaahatee hai. 4yah zameen hamaaray khaandaan ka mauroosee hissa hai, is liyay main nay munaasib samjha ki aap ko ittila doon taaki aap yah zameen khareed len. bait-lahem kay buzurg aur saath baithay raahanuma is kay gavaah hongay. laazim hai ki yah zameen hamaaray khaandaan ka hissa rahay, is liyay bataaen ki kya aap isay khareed kar chhudaaengay? aap ka sab say qareebee rishta hai, is liyay yah aap hee ka haq hai. agar aap zameen khareedna na chaahen to yah mera haq banega.” rishtedaar nay javaab diya, “theek hai, main isay khareed kar chhudaaoonga.” 5phir boaz bola, “agar aap naomee say zameen khareeden to aap ko us kee moaabee bahoo root say shaadee karnee padegee taaki marhoom shauhar kee jagah aulaad paida karen jo us ka naam rakh kar yah zameen sambhaalen.”
6yah sun kar rishtedaar nay kaha, “phir main isay khareedna naheen chaahata, kyoonki aisa karnay say meree mauroosee zameen ko nuqsaan pahunchega. aap hee isay khareed kar chhudaaen.”
7us zamaanay men agar aisay kisee muaamalay men koee zameen khareednay ka apna haq kisee doosray ko muntaqil karna chaahata tha to vah apnee chappal utaar kar usay day deta tha. is tareeqay say faisla qaanoonee taur par tai ho jaata tha. 8chunaanchay root kay ziyaada qareebee rishtedaar nay apnee chappal utaar kar boaz ko day dee aur kaha, “aap hee zameen ko khareed len.” 9tab boaz nay buzurgon aur baaqee logon kay saamnay elaan kiya, “aaj aap gavaah hain ki main nay naomee say sab kuchh khareed liya hai jo us kay marhoom shauhar ileemlik aur us kay do beton kilyon aur mahelon ka tha. 10saath hee main nay mahelon kee beva moaabee aurat root say shaadee karnay ka vaada kiya hai taaki mahelon kay naam say beta paida ho. yoon marhoom kee mauroosee zameen khaandaan say chhin naheen jaaegee, aur us ka naam hamaaray khaandaan aur bait-lahem kay baashindon men qaaim rahega. aaj aap sab gavaah hain!”
11buzurgon aur shaher kay darvaazay par baithay deegar mardon nay is kee tasdeeq kee, “ham gavaah hain! rabb aap kay ghar men aanay vaalee is aurat ko un barkaton say navaazay jin say us nay raakhil aur liyaah ko navaaza, jin say tamaam israaeelee niklay. rabb karay ki aap kee daulat aur izzat ifraata yaanee bait-lahem men badhtee jaaay. 12vah aap aur aap kee beevee ko utnee aulaad bakhshay jitnee tamar aur yahoodaah kay betay faaras kay khaandaan ko bakhshee thee.”
13chunaanchay root boaz kee beevee ban gaee. aur rabb kee marzee say root shaadee kay baad haamila huee. jab us kay beta huaa 14to bait-lahem kee aurton nay naomee say kaha, “rabb kee tamjeed ho! aap ko yah bachcha ata karnay say us nay aisa shakhs muhayya kiya hai jo aap ka khaandaan sambhaalega . allaah karay ki us kee shuharat pooray israaeel men phail jaaay. 15us say aap taazaadam ho jaaengee, aur budhaapay men vah aap ko sahaara dega. kyoonki aap kee bahoo jo aap ko piyaar kartee hai aur jis kee qadar-o-qeemat saat beton say badh kar hai usee nay usay janm diya hai!”
16naomee bachchay ko apnee god men bitha kar usay paalnay lagee. 17padosee aurton nay us ka naam obed yaanee khidmat karnay vaala rakha. unhon nay kaha, “naomee kay haan beta paida hua hai!”
obed daaood baadshaah kay baap yassee ka baap tha. 18zail men faaras ka daaood tak nasabnaama hai : faaras, hasron, 19raam, ammeenadaab, 20nahson, salmon, 21boaz, obed, 22yassee aur daaood.